ಹೊಸನಗರ: ವೈಭವೋಪೇತ ಹಿಂದು ದಿಗ್ವಿಜಯ ಯಾತ್ರೆಯ ಯಶಸ್ಸಿಗೆ ಅಭಿನಂದನೆ - ಅಖಿಲ ಭಾರತ ಹಿಂದು ಮಹಾಸಭಾ ವತಿಯಿಂದ ಕೃತಜ್ಞತೆ ಸಲ್ಲಿಕೆ

ಹೊಸನಗರ:ಸಾರ್ವಜನಿಕ ಶ್ರೀಗಣೇಶೋತ್ಸವ ಸಮಿತಿ, ಅಖಿಲ ಭಾರತ ಹಿಂದು ಮಹಾಸಭಾ ಹೊಸನಗರ ಘಟಕದ ವತಿಯಿಂದ ಆಚರಿಸಲ್ಪಟ್ಟ ಶ್ರೀಪರಾಭವ ಸಂವತ್ಸರ 2026ರ ಎಂಟನೇ ವರ್ಷದ ಅದ್ಧೂರಿ ಶ್ರೀಗಣೇಶೋತ್ಸವ ಹಾಗೂ ವೈಭವೋಪೇತ ಹಿಂದು ದಿಗ್ವಿಜಯ ಯಾತ್ರೆಯು ಯಶಸ್ವಿಯಾಗಿ ಸಂಪನ್ನಗೊಂಡಿದ್ದು, ಈ ಮಹತ್ವದ ಕಾರ್ಯಕ್ರಮಕ್ಕೆ ಸಹಕರಿಸಿದ ಸಮಸ್ತ ಹಿಂದು ಸಮಾಜಕ್ಕೆ ಕಾರ್ಯಸಂಚಾಲಕ್ ಶ್ರೀ ಅನೂಪ್ ಅರವಿಂದ್ ಅವರು ಧನ್ಯವಾದಗಳನ್ನು ಸಲ್ಲಿಸಿದ್ದಾರೆ.

ಸೆಪ್ಟೆಂಬರ್ 30, 2026ರ ಬುಧವಾರದಂದು ಜರುಗಿದ ಅವಲೋಕನ ಬೈಠಕ್ (ಪರಿಶೀಲನಾ ಸಭೆ) ಉದ್ದೇಶಿಸಿ ಮಾತನಾಡಿದ ಅವರು, "ಪ್ರತಿಷ್ಠಾಪನಾ ಯಾತ್ರೆಯಿಂದ ಹಿಡಿದು ವೀರ ಸಾವರ್ಕರ್ ಮಂಟಪದೊಳಗಿನ ಪ್ರಧಾನ ವೇದಿಕೆ 'ವೀರಸನ್ಯಾಸಿ ವಿವೇಕಾನಂದ'ದಲ್ಲಿ ನಡೆದ ಭಜನೆಗಳು, ಗಮಕ, ಭರತನಾಟ್ಯಗಳು, ಚಿಣ್ಣರ ನೃತ್ಯ ಮತ್ತು ಯಕ್ಷಗಾನಗಳು ನಮ್ಮ ಸಾಂಸ್ಕೃತಿಕ ಶ್ರೀಮಂತಿಕೆಯನ್ನು ಮತ್ತಷ್ಟು ಹೆಚ್ಚಿಸಿದವು" ಎಂದು ಹರ್ಷ ವ್ಯಕ್ತಪಡಿಸಿದರು. ಇದೇ ವೇಳೆ ಹಿಂದು ದಿಗ್ವಿಜಯ ಯಾತ್ರೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡ ಸಮಸ್ತ ಯುವ ಶಕ್ತಿ, ಮಾತೃ ಶಕ್ತಿ, ಸಜ್ಜನ ಶಕ್ತಿ, ಸುಪ್ತ ಶಕ್ತಿ ಮತ್ತು ಉತ್ಸುಕ ಶಕ್ತಿಗಳ ಜೊತೆಗೆ ವಿವಿಧ ಕಲಾತಂಡಗಳ ಸೇವೆಯನ್ನು ಸ್ಮರಿಸಿಕೊಂಡರು. ವಿವಿಧ ಸ್ಪರ್ಧೆಗಳ ಯಶಸ್ಸು ನಮಗೆ ಮುಂದಿನ ದಿನಗಳಲ್ಲಿ ಇನ್ನಷ್ಟು ಸ್ಪೂರ್ತಿ ಮತ್ತು ಪ್ರೇರಣೆಯನ್ನು ನೀಡಿದೆ ಎಂದರು.

ಈ ಸಂದರ್ಭದಲ್ಲಿ ಮಾತನಾಡಿದ ಗೌರವ ಸಂಚಾಲಕರಾದ ಶ್ರೀ ಕೆ.ಎಸ್. ವಿನಾಯಕ ಶ್ರೇಷ್ಠಿ ಅವರು, ಕಾರ್ಯಕ್ರಮದ ಯಶಸ್ಸಿಗೆ ಬೆನ್ನೆಲುಬಾಗಿ ನಿಂತ ಪ್ರತಿಯೊಬ್ಬ ದಾನಿ ಹಾಗೂ ಮಹಾದಾನಿಗಳನ್ನು ಸ್ಮರಿಸಿದರು. ವಿಶೇಷವಾಗಿ ರಕ್ಷಣಾ ಇಲಾಖೆ, ವಿದ್ಯುತ್ ಇಲಾಖೆ, ಕಂದಾಯ ಇಲಾಖೆ, ಪಟ್ಟಣ ಪಂಚಾಯತ್, ಪತ್ರಿಕಾ ಪ್ರತಿನಿಧಿ ಬಂಧುಗಳು, ವಿವಿಧ ಸಾರ್ವಜನಿಕ ಶ್ರೀಗಣೇಶೋತ್ಸವ ಮಂಡಳಿಗಳು, ಸಮಿತಿಯ ಎಲ್ಲಾ ಸದಸ್ಯರು, ಕಾರ್ಯಕರ್ತರು ಹಾಗೂ ಪ್ರತ್ಯಕ್ಷ ಹಾಗೂ ಅಪ್ರತ್ಯಕ್ಷವಾಗಿ ಸಹಕರಿಸಿದ ಮಹಾಜನತೆಗೆ ಕೃತಜ್ಞತೆಗಳನ್ನು ಅರ್ಪಿಸಿದರು.

ಈ ಬೈಠಕ್‌ನಲ್ಲಿ ಪ್ರಧಾನ ಸಂಚಾಲಕರಾದ ಗಣೇಶ್ ಮಧುಕರ್, ಪ್ರಧಾನ ಕೋಶಾಧಿಕಾರಿ ನಾಗರಾಜ್, ಸಾಂಸ್ಕೃತಿಕ ಸಂಚಾಲಕ ಮಂಜುನಾಥ್ ಪೂಜಾರಿ ಹಾಗೂ ಪ್ರಮುಖರಾದ ಸುರೇಂದ್ರ ಕೋಟ್ಯಾನ್, ನಂದಿ ಸಂತೋಷ್, ಸುಧೀಂದ್ರ ಪಂಡಿತ್, ಕೆ. ವಿನಯ್ ಕುಮಾರ್, ಶಿವಕುಮಾರ್, ಕಾವ್ಯ ಕಾರಣಗಿರಿ, ಮಂಜು ಸಂಜೀವ್, ಕಾರ್ತಿಕ್, ನಿಶ್ಚಿತ್ ಸೇರಿದಂತೆ ಅನೇಕ ಕಾರ್ಯಕರ್ತರು ಹಾಗೂ ಸಮಿತಿಯ ಸದಸ್ಯರು ಉಪಸ್ಥಿತರಿದ್ದರು.

ಸಂಪಾದಕೀಯ ನುಡಿ

ಸಾಂಸ್ಕೃತಿಕ ಪರಂಪರೆ, ಭಕ್ತಿ ಮತ್ತು ಹಿಂದು ಸಮಾಜದ ಸಂಘಟಿತ ಶಕ್ತಿಯ ಪ್ರತೀಕವಾಗಿರುವ ಸಾರ್ವಜನಿಕ ಶ್ರೀಗಣೇಶೋತ್ಸವ ಹಾಗೂ ದಿಗ್ವಿಜಯ ಯಾತ್ರೆಯು ಹೊಸನಗರದಲ್ಲಿ ಅತ್ಯಂತ ಶಿಸ್ತುಬದ್ಧವಾಗಿ ಮತ್ತು ವಿಜೃಂಭಣೆಯಿಂದ ನೆರವೇರಿರುವುದು ಹೆಮ್ಮೆಯ ವಿಷಯ. ಯಾವುದೇ ಅಡೆತಡೆಗಳಿಲ್ಲದೆ, ಎಲ್ಲರ ಸಹಕಾರದೊಂದಿಗೆ ಹಬ್ಬವನ್ನು ಯಶಸ್ವಿಗೊಳಿಸುವಲ್ಲಿ ಸಂಘಟಕರು ಮತ್ತು ಕಾರ್ಯಕರ್ತರ ಶ್ರಮ ಅಪಾರವಾದದ್ದು. ಇಂತಹ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ಸಮಾಜದಲ್ಲಿ ಒಗ್ಗಟ್ಟು, ಬಾಂಧವ್ಯ ಮತ್ತು ಸೌಹಾರ್ದತೆಯನ್ನು ಗಟ್ಟಿಗೊಳಿಸುವುದರಲ್ಲಿ ಯಾವುದೇ ಸಂಶಯವಿಲ್ಲ. ಮುಂದಿನ ದಿನಗಳಲ್ಲಿಯೂ ಈ ಉತ್ಸವವು ಮತ್ತಷ್ಟು ಎತ್ತರಕ್ಕೆ ಬೆಳೆಯಲಿ, ಸಮಾಜಕ್ಕೆ ಸತ್ಪ್ರೇರಣೆಯನ್ನು ನೀಡಲಿ ಎಂದು 'ಕನ್ನಡ ಗ್ಲೋಬಲ್ ನ್ಯೂಸ್' ವತಿಯಿಂದ ಹೃತ್ಪೂರ್ವಕ ಶುಭ ಹಾರೈಕೆಗಳು.