ಶೌರ್ಯ ಆನೆ ಸಾವು: ಚಿಕಿತ್ಸೆ ಫಲಕಾರಿಯಾಗದೆ ಮಲೆನಾಡಿನ ಸೆರೆಮನೆಯಲ್ಲಿ ಅಂತ್ಯಗೊಂಡ ಕಾಡಾನೆ!

ಶಿವಮೊಗ್ಗ:ಮಲೆನಾಡಿನಲ್ಲಿ ತೀವ್ರ ಆತಂಕ ಸೃಷ್ಟಿಸಿದ್ದ, ಚಿಕ್ಕಮಗಳೂರು ಜಿಲ್ಲೆಯ ಬಾಳೆಹೊನ್ನೂರು ಭಾಗದಲ್ಲಿ ಇಬ್ಬರು ಕಾರ್ಮಿಕರ ಸಾವಿಗೆ ಕಾರಣವಾಗಿದ್ದ ಕುಖ್ಯಾತ 'ಶೌರ್ಯ' ಹೆಸರಿನ ಕಾಡಾನೆ, ಶಿವಮೊಗ್ಗದ ಸಕ್ರೆಬೈಲು ಆನೆ ಬಿಡಾರದಲ್ಲಿ ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದೆ.

ಘಟನೆಯ ಹಿನ್ನೆಲೆ:

2026ರ ಫೆಬ್ರವರಿಯಲ್ಲಿ ಬಾಳೆಹೊನ್ನೂರು ಸಮೀಪದ ಹ್ಯಾರಂಬಿಪುರ ಭಾಗದ ಕಾಫಿ ತೋಟದಲ್ಲಿ ನಡೆದ ಕಾಡಾನೆ ದಾಳಿಯಲ್ಲಿ ಹಾವೇರಿ ಮೂಲದ ಯಲ್ಲಪ್ಪ ಹಾಗೂ ಅದೇ ವಾರದೊಳಗೆ ಹೊಸಪೇಟೆ ಮೂಲದ ಬೋರಮ್ಮ (34) ಎಂಬ ಕಾರ್ಮಿಕರು ದಾರುಣವಾಗಿ ಮೃತಪಟ್ಟಿದ್ದರು. ಈ ಸರಣಿ ದುರಂತಗಳ ಬಳಿಕ ಎಚ್ಚೆತ್ತ ಅರಣ್ಯ ಇಲಾಖೆಯು, 7 ಸಾಕಾನೆಗಳ ಹಾಗೂ 75ಕ್ಕೂ ಹೆಚ್ಚು ಅರಣ್ಯ ಸಿಬ್ಬಂದಿಗಳ ಬೃಹತ್ ಕಾರ್ಯಾಚರಣೆಯ ಮೂಲಕ ಈ ಕಾಡಾನೆಯನ್ನು ಯಶಸ್ವಿಯಾಗಿ ಸೆರೆಹಿಡಿದಿತ್ತು.

ನಂತರ ಆಕೆಯನ್ನು ಶಿವಮೊಗ್ಗದ ಪ್ರಸಿದ್ಧ ಸಕ್ರೆಬೈಲು ಆನೆ ಬಿಡಾರಕ್ಕೆ ಸ್ಥಳಾಂತರಿಸಿ, 'ಶೌರ್ಯ' ಎಂದು ಹೆಸರಿಡಲಾಗಿತ್ತು. ಬಿಡಾರದಲ್ಲಿ ಮರದ ಕ್ರೇಲ್‌ನಲ್ಲಿರಿಸಿ ಮಾವುತರು ಹಾಗೂ ಕಾವಾಡಿಗರು ಕಳೆದ ಮೂರು ತಿಂಗಳಿಂದ ಆನೆಗೆ ತರಬೇತಿ ಹಾಗೂ ಆರೈಕೆ ಮಾಡುತ್ತಿದ್ದರು.

ಸಾವಿಗೆ ಅಸಲಿ ಕಾರಣವೇನು?

ಸೆರೆಹಿಡಿಯುವ ಮತ್ತು ಕಾರ್ಯಾಚರಣೆಯ ಸಂದರ್ಭದಲ್ಲಿ ಆನೆಯ ಕಾಲು ಹಾಗೂ ದೇಹದ ವಿವಿಧ ಭಾಗಗಳಿಗೆ, ವಿಶೇಷವಾಗಿ ತೊಡೆಯ ಒಳಭಾಗದಲ್ಲಿ ತೀವ್ರ ಸ್ವರೂಪದ ಗಾಯಗಳಾಗಿದ್ದವು. ಆರಂಭದಲ್ಲಿ ಇದನ್ನು ಗಂಭೀರವಾಗಿ ಪರಿಗಣಿಸದ ಕಾರಣ, ಒಳಭಾಗದಲ್ಲಿದ್ದ ಗಾಯವು ದಿನದಿಂದ ದಿನಕ್ಕೆ ಉಲ್ಬಣಗೊಂಡಿತ್ತು. ಸೆಪ್ಟೆಂಬರ್ 30ರ ಸಂಜೆ ಆನೆ ಬಿಡಾರದಲ್ಲಿಯೇ ಕುಸಿದುಬಿದ್ದಿತ್ತು. ತಕ್ಷಣವೇ ಅರಣ್ಯ ಇಲಾಖೆಯ ಪಶುವೈದ್ಯರು ತುರ್ತು ಚಿಕಿತ್ಸೆ ನೀಡಿದರಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಅಕ್ಟೋಬರ್ 01ರ ಬೆಳಿಗ್ಗೆ ಶೌರ್ಯ ಆನೆ ಕೊನೆಯುಸಿರೆಳೆಯಿತು.

ಸಂಪಾದಕೀಯ ನುಡಿ:

ಮನುಷ್ಯ ಮತ್ತು ವನ್ಯಜೀವಿಗಳ ನಡುವಿನ ಸಂಘರ್ಷ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವುದು ಕಳವಳಕಾರಿ ಸಂಗತಿ. ಕಾಡಾನೆಗಳ ಹಾವಳಿಯನ್ನು ನಿಯಂತ್ರಿಸಲು ಮತ್ತು ಜನರ ಜೀವ ರಕ್ಷಿಸಲು ಅರಣ್ಯ ಇಲಾಖೆ ಕೈಗೊಳ್ಳುವ ಕಾರ್ಯಾಚರಣೆಗಳು ಅನಿವಾರ್ಯವಾದರೂ, ಸೆರೆಹಿಡಿಯುವ ಮತ್ತು ಪಳಗಿಸುವ ಪ್ರಕ್ರಿಯೆಯಲ್ಲಿ ಪ್ರಾಣಿಗಳ ಆರೋಗ್ಯ ಹಾಗೂ ಸುರಕ್ಷತೆಗೆ ಮತ್ತಷ್ಟು ವೈಜ್ಞಾನಿಕ ಮುನ್ನೆಚ್ಚರಿಕೆಗಳನ್ನು ವಹಿಸುವುದು ಅತ್ಯಗತ್ಯ. ಸೆರೆಸಿಕ್ಕ ಬಳಿಕ ಮೂಕ ಪ್ರಾಣಿಗಳಿಗೆ ಸರಿಯಾದ ವೈದ್ಯಕೀಯ ಚಿಕಿತ್ಸೆ ಮತ್ತು ಪುನರ್ವಸತಿ ಸಿಗುವಂತಾಗಲು ಇಲಾಖೆ ಹೆಚ್ಚಿನ ಆಧ್ಯತೆ ನೀಡಬೇಕಿದೆ. ಶೌರ್ಯ ಆನೆಯ ದುರ್ಮರಣ ವನ್ಯಜೀವಿ ಪ್ರಿಯರಲ್ಲಿ ಹಾಗೂ ಅರಣ್ಯ ಸಂರಕ್ಷಕರ ವಲಯದಲ್ಲಿ ತೀವ್ರ ನೋವನ್ನುಂಟುಮಾಡಿದೆ.