ಶಿವಮೊಗ್ಗದಲ್ಲಿ ₹121 ಕೋಟಿ ಮರಳು ಹಗರಣ: ಅಧಿಕಾರಿಗಳ ಅಕ್ರಮ ಜಾಲ ಬಯಲು ಮಾಡಿದ ಲೋಕಾಯುಕ್ತ!

ಶಿವಮೊಗ್ಗ:ಜಿಲ್ಲೆಯ ಜೀವನಾಡಿಗಳಾದ ತುಂಗಾ, ಭದ್ರಾ ಮತ್ತು ಶರಾವತಿ ನದಿ ಪಾತ್ರಗಳಲ್ಲಿ ಮರಳು ಹಾಗೂ ಮಣ್ಣು ಗಣಿಗಾರಿಕೆಯ ಹೆಸರಿನಲ್ಲಿ ಬಹುದೊಡ್ಡ ಮಟ್ಟದ ಅಕ್ರಮ ದಂಧೆ ನಡೆಯುತ್ತಿರುವುದು ಲೋಕಾಯುಕ್ತ ಪೊಲೀಸರ ತನಿಖಾ ವರದಿಯಿಂದ ಬಹಿರಂಗವಾಗಿದೆ. ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಅಧಿಕಾರಿಗಳ ಶಾಮೀಲಾತಿಯಿಂದಾಗಿ ಸರ್ಕಾರಕ್ಕೆ ಬರಬೇಕಿದ್ದ ₹121.14 ಕೋಟಿಗೂ ಅಧಿಕ ರಾಜಧನ, ದಂಡ ಹಾಗೂ ನಿಯಮ ಉಲ್ಲಂಘನೆಯ ಹಣ ವಸೂಲಿಯಾಗದೇ ನಷ್ಟವಾಗಿದೆ.

ತನಿಖಾ ವರದಿ ಸರ್ಕಾರಕ್ಕೆ ಸಲ್ಲಿಕೆಯಾಗುತ್ತಿದ್ದಂತೆ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಉಪನಿರ್ದೇಶಕ ಪಿ.ಕೆ.ನಾಯಕ್ ಅವರನ್ನು ವರ್ಗಾವಣೆ ಮಾಡಲಾಗಿದ್ದು, ಅಕ್ರಮದಲ್ಲಿ ಅಧಿಕಾರಿಗಳ ಪಾತ್ರದ ಕುರಿತು ಇಲಾಖಾ ವಿಚಾರಣೆಗೂ ಪ್ರಸ್ತಾಪಿಸಲಾಗಿದೆ.

ಲೋಕಾಯುಕ್ತ ವರದಿಯಲ್ಲಿ ಬಯಲಾದ ಪ್ರಮುಖ ಅಕ್ರಮಗಳು:

• ಸಿಂಡಿಕೇಟ್ ಸ್ವರೂಪ ಪಡೆದ ದಂಧೆ:

  ಶಿವಮೊಗ್ಗ ಜಿಲ್ಲೆಯಲ್ಲಿ ಮರಳು ಗಣಿಗಾರಿಕೆಯು ಒಂದು ದೊಡ್ಡ 'ಸಿಂಡಿಕೇಟ್' ಮಾಫಿಯಾವಾಗಿ ಮಾರ್ಪಟ್ಟಿದೆ. ಗಣಿ ಇಲಾಖೆಯ ಅಧಿಕಾರಿಗಳೇ ಈ ಅಕ್ರಮಕ್ಕೆ ಬೆನ್ನೆಲುಬಾಗಿ ನಿಂತಿದ್ದಾರೆ. ಗಣಿಗಾರಿಕೆಯ ಪ್ರತಿಯೊಂದು ಸ್ಥಳದಲ್ಲೂ ಮಧ್ಯವರ್ತಿಗಳು ಹುಟ್ಟಿಕೊಂಡಿದ್ದು, ಅಕ್ರಮವನ್ನು ನಿಯಂತ್ರಿಸುತ್ತಿದ್ದಾರೆ.

• 1 ಲೋಡ್ ಪಾಸ್‌ಗೆ 10 ಲೋಡ್ ಸಾಗಣೆ!

  ನದಿಯಿಂದ ಮರಳು ತೆಗೆಯಲು ಒಂದು ಲೋಡ್‌ಗೆ ಅನುಮತಿ (ಪಾಸ್) ಪಡೆದು, ಬರೋಬ್ಬರಿ 10 ಲೋಡ್‌ಗಳಷ್ಟು ಮರಳನ್ನು ಅಕ್ರಮವಾಗಿ ಸಾಗಿಸಲಾಗುತ್ತಿದೆ. ತೀರ್ಥಹಳ್ಳಿ ತಾಲೂಕಿನ ಮಂಡಗದ್ದೆ ಭಾಗದಿಂದ ಮರಳು ಸಾಗಿಸಲು ಪಾಸ್ ಪಡೆದು, ದಬ್ಬಣಗದ್ದೆಯಂತಹ ಭಿನ್ನ ಸ್ಥಳಗಳಿಂದ ಮರಳು ಎತ್ತುವ ತಂತ್ರ ಅನುಸರಿಸಲಾಗುತ್ತಿದೆ. ಕಪ್ಪು ಪಟ್ಟಿಯಲ್ಲಿದ್ದವರಿಗೂ ಗುತ್ತಿಗೆ ನೀಡಲಾಗಿರುವುದು ಬೆಳಕಿಗೆ ಬಂದಿದೆ.

• 2 ಎಕರೆಗೆ ಅನುಮತಿ – 100 ಎಕರೆಯಲ್ಲಿ ಲೂಟಿ:

  ಕೆಲವು ನಿರ್ದಿಷ್ಟ ಬ್ಲಾಕ್‌ಗಳಲ್ಲಿ ಕೇವಲ 2 ಎಕರೆ ಪ್ರದೇಶದಲ್ಲಿ ಗಣಿಗಾರಿಕೆಗೆ ಅನುಮತಿ ಪಡೆದು, ಬರೋಬ್ಬರಿ 100 ಎಕರೆ ವ್ಯಾಪ್ತಿಯಲ್ಲಿ ಅಕ್ರಮವಾಗಿ ಮರಳು ಲೂಟಿ ಮಾಡಲಾಗಿದೆ. ನಿಯಮಗಳ ಪ್ರಕಾರ ನದಿಯಿಂದ ತೆಗೆದ ಮರಳನ್ನು 'ಸ್ಟಾಕ್ ಯಾರ್ಡ್'ನಲ್ಲಿ ಶೇಖರಿಸಿ, ತೂಕ ಮಾಡಿ, ಸಿಸಿಟಿವಿ ಕಣ್ಗಾವಲಿನಲ್ಲಿ ಕೊಂಡೊಯ್ಯಬೇಕು. ಆದರೆ ಯಾವುದೇ ನಿಯಮ ಪಾಲಿಸದೇ ನೇರವಾಗಿ ನದಿ ಪಾತ್ರದಿಂದಲೇ ಮರಳು ಸಾಗಿಸಲಾಗುತ್ತಿದೆ.

• 15 ರಿಂದ 20 ಅಡಿ ಆಳದ ತಾಣಗಳು – ಸಾರ್ವಜನಿಕರ ಜೀವಕ್ಕೆ ಕಂಟಕ:

  ನಿಯಮಗಳ ಪ್ರಕಾರ ಮರಳು ಗಣಿಗಾರಿಕೆ ವೇಳೆ ಗರಿಷ್ಠ 3 ಅಡಿ ಆಳದವರೆಗೆ ಮಾತ್ರ ಮರಳು ತೆಗೆಯಲು ಅವಕಾಶವಿದೆ. ಆದರೆ, ನದಿಗಳಲ್ಲಿ ಜೆಸಿಬಿ ಮತ್ತು ಬೃಹತ್ ಯಂತ್ರಗಳನ್ನು ಬಳಸಿ 10ರಿಂದ 15 ಅಡಿ, ಕೆಲವು ಕಡೆ 20 ಅಡಿಯಷ್ಟು ಆಳದ ಭೀಕರ ಗುಂಡಿಗಳನ್ನು ತೋಡಲಾಗಿದೆ. ಈ ಅಕ್ರಮ ಗುಂಡಿಗಳ ಅರಿವಿಲ್ಲದೇ ಈಜಲು ಹೋದ ಹಲವಾರು ಸಾರ್ವಜನಿಕರು ಹಾಗೂ ಯುವಕರು ಮುಳುಗಿ ಮೃತಪಟ್ಟಿರುವುದು ವರದಿಯಲ್ಲಿ ಉಲ್ಲೇಖವಾಗಿದೆ.

• ಕಲ್ಲು ಕ್ವಾರಿಗಳಲ್ಲೂ ವಂಚನೆ, ಸಬ್-ಲೀಸ್ ದಂಧೆ:

  ಒಂದೇ ಲೈಸೆನ್ಸ್ ಪಡೆದು ನಾಲ್ಕಾರು ಕಡೆಗಳಲ್ಲಿ ಕಲ್ಲು ಗಣಿಗಾರಿಕೆ ನಡೆಸಲಾಗುತ್ತಿದೆ. ಲೀಸ್ ಪಡೆದವರು ಅದನ್ನು 'ಸಬ್ ಲೀಸ್' (ಉಪ ಗುತ್ತಿಗೆ) ನೀಡಿ ಲಕ್ಷಾಂತರ ರೂಪಾಯಿ ವಂಚಿಸುತ್ತಿದ್ದಾರೆ.

ಶಾಸಕರ ಪ್ರತಿಕ್ರಿಯೆ:

"ಜಿಲ್ಲೆಯಲ್ಲಿ ನಡೆಯುತ್ತಿರುವ ಅಕ್ರಮ ಮರಳು ಗಣಿಗಾರಿಕೆ ವಿರುದ್ಧ ನಾನೇ ಖುದ್ದಾಗಿ ಗಣಿ ಇಲಾಖೆಗೆ ದೂರು ನೀಡಿದ್ದೆ. ಸರ್ಕಾರಕ್ಕೆ ಸೇರಬೇಕಾದ ರಾಜಧನವನ್ನು ಅಧಿಕಾರಿಗಳೇ ಕದ್ದು ತಿಂದಿದ್ದಾರೆ. ಈ ಅಕ್ರಮಗಳಲ್ಲಿ ಇಲಾಖೆಯ ಅಧಿಕಾರಿಗಳ ಪಾಲುದಾರಿಕೆಯೂ ಇದೆ. ಈ ಪ್ರಕರಣದ ತನಿಖೆ ಸಂಪೂರ್ಣಗೊಂಡರೆ ಇನ್ನಷ್ಟು ಸ್ಫೋಟಕ ಸಂಗತಿಗಳು ಹೊರಬರಲಿವೆ."

– ಆರಗ ಜ್ಞಾನೇಂದ್ರ, ಶಾಸಕರು, ತೀರ್ಥಹಳ್ಳಿ

ಸಂಪಾದಕೀಯ ನುಡಿ :

ಪ್ರಕೃತಿಯ ಸೌಂದರ್ಯಕ್ಕೆ ಕಂಟಕವಾದ ಗಣಿ ಮಾಫಿಯಾ: ಶಿಸ್ತುಕ್ರಮ ಎಂದು?

ಮಲೆನಾಡಿನ ಹೆಮ್ಮೆಯ ನದಿಗಳಾದ ತುಂಗಾ, ಭದ್ರಾ ಮತ್ತು ಶರಾವತಿ ಇಂದು ಮರಳು ಮಾಫಿಯಾದ ರಾಕ್ಷಸೀಯ ಕೃತ್ಯಕ್ಕೆ ಸಿಲುಕಿ ನಲುಗುತ್ತಿರುವುದು ತೀವ್ರ ಆತಂಕಕಾರಿ ಸಂಗತಿ. ನದಿ ಪಾತ್ರಗಳನ್ನು 20 ಅಡಿಯಷ್ಟು ಆಳಕ್ಕೆ ತೋಡಿ ನಿಯಮಗಳನ್ನು ಗಾಳಿಗೆ ತೂರುವುದು ಎಂದರೆ ಅದು ಕೇವಲ ಆರ್ಥಿಕ ಅಪರಾಧವಷ್ಟೇ ಅಲ್ಲ, ಪರಿಸರದ ಮೇಲಿನ ಭೀಕರ ಆಕ್ರಮಣ. ನಿರಪರಾಧಿಗಳು ಈ ಅಕ್ರಮ ಗುಂಡಿಗಳಿಗೆ ಬಲಿಯಾಗುತ್ತಿರುವುದು ಅತ್ಯಂತ ಶೋಚನೀಯ.

ಸರ್ಕಾರಕ್ಕೆ ₹121 ಕೋಟಿಗೂ ಹೆಚ್ಚು ನಷ್ಟ ಉಂಟುಮಾಡಿದ ಈ ಸಿಂಡಿಕೇಟ್‌ನಲ್ಲಿ ಕೇವಲ ಒಬ್ಬ ಅಧಿಕಾರಿಯ ವರ್ಗಾವಣೆಯಿಂದ ನ್ಯಾಯ ಸಿಕ್ಕಂತಾಗುವುದಿಲ್ಲ. ಅಧಿಕಾರಿಗಳು ಮತ್ತು ರಾಜಕಾರಣಿಗಳ ಕೃಪಾಕಟಾಕ್ಷವಿಲ್ಲದೆ ಇಷ್ಟೊಂದು ದೊಡ್ಡ ಪ್ರಮಾಣದ ಅಕ್ರಮ ಸಾಧ್ಯವಿಲ್ಲ. ಲೋಕಾಯುಕ್ತ ವರದಿ ಆಧರಿಸಿ, ಈ ದಂಧೆಯಲ್ಲಿ ಭಾಗಿಯಾಗಿರುವ ಎಲ್ಲಾ ಕಪ್ಪುಚುಕ್ಕಿ ಅಧಿಕಾರಿಗಳನ್ನು ತಕ್ಷಣ ಸೇವೆಯಿಂದ ವಜಾಗೊಳಿಸಬೇಕು ಹಾಗೂ ಅಕ್ರಮ ಗಣಿಗಾರಿಕೆ ನಡೆಸಿದವರ ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳಬೇಕು. ನದಿಗಳ ಉಳಿವು ಮತ್ತು ಪರಿಸರ ಸಮತೋಲನಕ್ಕಾಗಿ ಸರ್ಕಾರ ತಕ್ಷಣವೇ ಕಠಿಣ ಕ್ರಮ ಕೈಗೊಳ್ಳಬೇಕಿದೆ.