ಕಲಘಟಗಿ: ಗುಡ್ ನ್ಯೂಸ್ ಕಾಲೇಜಿನಲ್ಲಿ ವಿದ್ಯಾರ್ಥಿಗಳ ಬೀಳ್ಕೊಡುಗೆ ಹಾಗೂ ಪಠ್ಯೇತರ ಚಟುವಟಿಕೆಗಳ ಸಮಾರೋಪ ಸಮಾರಂಭ

ಕಲಘಟಗಿ: ತಾಲೂಕಿನ ಹೊರವಲಯದಲ್ಲಿರುವ ಪ್ರತಿಷ್ಠಿತ ಗುಡ್ ನ್ಯೂಸ್ ವೆಲ್ಫೇರ್ ಸಂಸ್ಥೆಯ ಕಲಾ ಹಾಗೂ ವಾಣಿಜ್ಯ ಪ್ರಥಮ ದರ್ಜೆ ಮಹಾವಿದ್ಯಾಲಯದಲ್ಲಿ ಬಿ.ಎ. ಮತ್ತು ಬಿ.ಕಾಂ. ಅಂತಿಮ ವರ್ಷದ ವಿದ್ಯಾರ್ಥಿಗಳ ಬೀಳ್ಕೊಡುಗೆ ಹಾಗೂ ಸಾಂಸ್ಕೃತಿಕ, ಪಠ್ಯೇತರ ಚಟುವಟಿಕೆಗಳ ಸಮಾರೋಪ ಸಮಾರಂಭವು ಮಂಗಳವಾರ ಅತ್ಯಂತ ಅದ್ಧೂರಿಯಾಗಿ ಜರುಗಿತು.

ಪುಸ್ತಕದಿಂದಲೇ ಸಂಸ್ಕಾರ ಹಾಗೂ ಜ್ಞಾನ ವೃದ್ಧಿ: ಪ್ರೊ. ಎಸ್.ವಿ. ವಸ್ತ್ರದ

ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡು ಮಾತನಾಡಿದ ಅಂಕೋಲಾದ ಜಿ.ಸಿ. ಕಾಲೇಜಿನ ಪ್ರಾಚಾರ್ಯರು ಹಾಗೂ ಕರ್ನಾಟಕ ವಿಶ್ವವಿದ್ಯಾಲಯದ ಸಿಂಡಿಕೇಟ್ ಸದಸ್ಯರಾದ ಪ್ರೊ. ಎಸ್.ವಿ. ವಸ್ತ್ರದ, "ಗ್ರಾಮೀಣ ಭಾಗದ ವಿದ್ಯಾರ್ಥಿಗಳಲ್ಲಿ ಅಪಾರ ಪ್ರತಿಭೆಯಡಗಿದೆ. ಧೃಢ ಸಂಕಲ್ಪ, ಕಠಿಣ ಪರಿಶ್ರಮ ಹಾಗೂ ಛಲದಿಂದ ಅವರು ಯಾವುದೇ ಸವಾಲುಗಳನ್ನು ಎದುರಿಸಬಲ್ಲರು. ಸೂಕ್ತ ವೇದಿಕೆ ದೊರೆತರೆ ಗ್ರಾಮೀಣ ಪ್ರತಿಭೆಗಳು ಅದ್ಭುತ ಸಾಧನೆ ಮಾಡುತ್ತಾರೆ," ಎಂದರು.

ಮುಂದುವರಿದು ಮಾತನಾಡಿದ ಅವರು, "ಇಂದಿನ ಡಿಜಿಟಲ್ ಯುಗದಲ್ಲಿ ಮೊಬೈಲ್ ಎಷ್ಟೇ ಪ್ರಭಾವಶಾಲಿಯಾಗಿದ್ದರೂ, ನಿಜವಾದ ಜ್ಞಾನ ಮತ್ತು ಸಂಸ್ಕಾರ ಪುಸ್ತಕಗಳಿಂದ ಮಾತ್ರ ಸಾಧ್ಯ. ವಿದ್ಯಾರ್ಥಿಗಳು ಮೊಬೈಲ್ ಚಟದಿಂದ ಹೊರಬಂದು ಗ್ರಂಥಾಲಯಗಳ ಸದುಪಯೋಗ ಪಡೆದುಕೊಳ್ಳಬೇಕು. ಕನ್ನಡ ಸಾಹಿತ್ಯಕ್ಕೆ ಈಗಾಗಲೇ 8 ಜ್ಞಾನಪೀಠ ಪ್ರಶಸ್ತಿಗಳು ಸಂದಿವೆ. ಇಂತಹ ಅತ್ಯಂತ ಪ್ರಾಚೀನ ಹಾಗೂ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯನ್ನು ಯುವ ಪೀಳಿಗೆ ಮುನ್ನಡೆಸಬೇಕು. ಕಲೆ, ಸಾಹಿತ್ಯ, ಎನ್.ಎಸ್.ಎಸ್., ಸ್ಕೌಟ್ಸ್‌ನಂತಹ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡು ವ್ಯಕ್ತಿತ್ವ ವಿಕಸನ ಮಾಡಿಕೊಳ್ಳಬೇಕು," ಎಂದು ವಿದ್ಯಾರ್ಥಿಗಳಿಗೆ ಕರೆ ನೀಡಿದರು.

ಶಿಕ್ಷಣ ವ್ಯಕ್ತಿತ್ವ ವಿಕಸನದ ಬುನಾದಿ: ಡಾ. ಎಮ್.ಡಿ. ಹೊರಕೇರಿ

ಕಾರ್ಯಕ್ರಮದ ಘನ ಅಧ್ಯಕ್ಷತೆ ವಹಿಸಿದ್ದ ಮಹಾವಿದ್ಯಾಲಯದ ಪ್ರಾಚಾರ್ಯರಾದ ಡಾ. ಎಮ್.ಡಿ. ಹೊರಕೇರಿ ಅವರು ಶೈಕ್ಷಣಿಕ ವರ್ಷದ ಪಠ್ಯೇತರ ಚಟುವಟಿಕೆಗಳ ವರದಿ ಮಂಡಿಸಿ ಮಾತನಾಡಿ, "ಶಿಕ್ಷಣದಲ್ಲಿ ವಿದ್ಯಾರ್ಥಿಗಳ ಪಾತ್ರ ಅತ್ಯಂತ ನಿರ್ಣಾಯಕವಾದದ್ದು. ವಿದ್ಯಾರ್ಥಿಗಳು ಕೇವಲ ಜ್ಞಾನವನ್ನು ಸ್ವೀಕರಿಸುವವರಾಗದೆ, ಕಲಿಕೆಯ ಪ್ರಕ್ರಿಯೆಯ ಮುಖ್ಯ ರೂವಾರಿಗಳಾಗಬೇಕು. ಶಿಕ್ಷಣವು ಅವರ ಸಂಪೂರ್ಣ ವ್ಯಕ್ತಿತ್ವ ವಿಕಸನಕ್ಕೆ ಭದ್ರ ಬುನಾದಿ ಕಲ್ಪಿಸುತ್ತದೆ," ಎಂದು ಆಶಯ ವ್ಯಕ್ತಪಡಿಸಿದರು.

ಸಾಧಕ ವಿದ್ಯಾರ್ಥಿಗಳಿಗೆ ಸನ್ಮಾನ

2025-26ನೇ ಶೈಕ್ಷಣಿಕ ಸಾಲಿನಲ್ಲಿ ಅತ್ಯುತ್ತಮ ಸಾಧನೆಗೈದ ವಿದ್ಯಾರ್ಥಿಗಳಿಗೆ ಪ್ರಶಸ್ತಿ ಫಲಕಗಳನ್ನು ನೀಡಿ ಗೌರವಿಸಲಾಯಿತು:

• ವರ್ಷದ ಅತ್ಯುತ್ತಮ (ಆದರ್ಶ) ವಿದ್ಯಾರ್ಥಿ: ಕುಮಾರ್ ಶ್ರೀಹರಿ ಕಡ್ಡಿಗೌಡರ

• ವರ್ಷದ ಅತ್ಯುತ್ತಮ (ಆದರ್ಶ) ವಿದ್ಯಾರ್ಥಿನಿ: ಕುಮಾರಿ ರೋಷನಿ ನಾಯ್ಕರ

• ಅದ್ವಿತೀಯ ವಿದ್ಯಾರ್ಥಿನಿ: ಕುಮಾರಿ ತನುಜಾ ಹರಿಜನ

• ಅಸಾಮಾನ್ಯ ವಿದ್ಯಾರ್ಥಿನಿ: ಕುಮಾರಿ ಕಾತುನಬಿ ಫನಿಬಂದ

ಸಮಾರಂಭದಲ್ಲಿ ಎಮ್.ಬಿ. ಉಳ್ಳಾಗಡ್ಡಿ ಅವರು ಸಾಧಕ ವಿದ್ಯಾರ್ಥಿಗಳಿಗೆ ಪ್ರಶಸ್ತಿಗಳನ್ನು ವಿತರಿಸಿ ಶುಭ ಹಾರೈಸಿದರು.

ಗಣ್ಯರ ಉಪಸ್ಥಿತಿ

ಕಾರ್ಯಕ್ರಮದಲ್ಲಿ ಗೃಹಿಣಿ ತರಬೇತಿ ಕೇಂದ್ರದ ಮುಖ್ಯಸ್ಥರಾದ ರೆ. ಸಿಸ್ಟರ್ ಸವರಿ, ಕಾಲೇಜು ಒಕ್ಕೂಟದ ಸಂಯೋಜಕರಾದ ಎನ್. ಆರ್. ನೆನಕ್ಕಿ, ಮಹಿಳಾ ಪ್ರತಿನಿಧಿ ಕುಮಾರಿ ಆಶಾ ನೇಕಾರ ಉಪಸ್ಥಿತರಿದ್ದರು.

ವೇದಿಕೆಯಲ್ಲಿ ಉಪನ್ಯಾಸಕರುಗಳಾದ ಶ್ರೀಮತಿ ಕುಲಸುಂಬಿ ಶೇಖ್, ಕುಮಾರಿ ಅಕ್ಷತಾ ಕುಬ್ಯಾಳ, ಶ್ರೀ ಶಶಿಕುಮಾರ ಕಟ್ಟಿಮನಿ, ಕುಮಾರಿ ಸಂಧ್ಯಾ ಗಾಂವಕರ, ರೈಮಾನಸಾಬ ಗೋಲಳ್ಳಿ, ಮಹಾಂತೇಶ ನಿಂಬಣ್ಣವರ, ಶಶಿಧರಯ್ಯ ಹೆಬ್ಬಳ್ಳಿಮಠ ಸೇರಿದಂತೆ ಬೋಧಕ ಹಾಗೂ ಬೋಧಕೇತರ ಸಿಬ್ಬಂದಿ, ವಿದ್ಯಾರ್ಥಿಗಳ ಪೋಷಕರು ಉಪಸ್ಥಿತರಿದ್ದರು.

ಕುಮಾರಿ ಅನ್ನಪೂರ್ಣ ರಾಟಿ ಹಾಗೂ ಸಂಗಡಿಗರು ಪ್ರಾರ್ಥನಾ ಗೀತೆ ಹಾಡಿದರು. ಕುಮಾರಿ ಶಿವಲೀಲಾ ಹಿರೇಮಠ ಮತ್ತು ಸೌಜನ್ಯ ವೀರಭದ್ರಗೌಡ ಕಾರ್ಯಕ್ರಮ ನಿರೂಪಿಸಿದರು. ಕುಮಾರಿ ಆಶಾ ನೇಕಾರ ವಂದನಾರ್ಪಣೆ ಮಾಡಿದರು.

ವರದಿ: ಪ್ರಭು ರಂಗಾಪುರ (Prabhu Rangapur)

ಪತ್ರಕರ್ತರು, ದಾರವಾಡ 

ಸಂಪಾದಕೀಯ ನುಡಿ (Editorial Desk):

ಗ್ರಾಮೀಣ ಪ್ರದೇಶದ ವಿದ್ಯಾರ್ಥಿಗಳಿಗೆ ಕೇವಲ ಪಠ್ಯ ಪುಸ್ತಕದ ಜ್ಞಾನ ಮಾತ್ರವಲ್ಲದೆ, ಅವರಲ್ಲಿರುವ ಸಾಂಸ್ಕೃತಿಕ ಹಾಗೂ ಸೃಜನಶೀಲ ಪ್ರತಿಭೆಗಳನ್ನು ಹೊರತರಲು ಇಂತಹ ಸಮಾರೋಪ ಮತ್ತು ಬೀಳ್ಕೊಡುಗೆ ಸಮಾರಂಭಗಳು ಅತ್ಯಂತ ಪೂರಕವಾಗಿವೆ. ಮೊಬೈಲ್ ವ್ಯಾಮೋಹದ ಇಂದಿನ ದಿನಗಳಲ್ಲಿ ಗ್ರಂಥಾಲಯಗಳ ಬಳಕೆ ಮತ್ತು ಪುಸ್ತಕ ಸಂಸ್ಕೃತಿಯ ಮಹತ್ವವನ್ನು ವಿದ್ಯಾರ್ಥಿಗಳಿಗೆ ಮನವರಿಕೆ ಮಾಡಿಕೊಟ್ಟಿರುವುದು ಶ್ಲಾಘನೀಯ. ಪದವಿ ಮುಗಿಸಿ ಹೊರಹೋಗುತ್ತಿರುವ ವಿದ್ಯಾರ್ಥಿಗಳ ಭವಿಷ್ಯ ಉಜ್ವಲವಾಗಲಿ ಎಂದು 'ಕನ್ನಡ ಗ್ಲೋಬಲ್ ನ್ಯೂಸ್' ಶುಭ ಹಾರೈಸುತ್ತದೆ.