ಮಲೆನಾಡಿಗೆ ಬೇಡ ಅಣು ವಿದ್ಯುತ್: ಬೇಸೂರಿನಿಂದ ಸಾಗರಕ್ಕೆ ಹರಿದುಬಂದ ಜನಸಾಗರ, ಬೃಹತ್ ಪಾದಯಾತ್ರೆ

ಸಾಗರ: ಪರಿಸರ ಸೂಕ್ಷ್ಮ ಪ್ರದೇಶವಾಗಿರುವ ಮಲೆನಾಡಿನ ಒಡಲಲ್ಲಿ ಪ್ರಸ್ತಾವಿತ 'ಬೇಸೂರು ಅಣು ವಿದ್ಯುತ್ ಸ್ಥಾವರ' ನಿರ್ಮಾಣ ವಿರೋಧಿಸಿ ಜನಾಕ್ರೋಶ ಭುಗಿಲೆದ್ದಿದೆ. ಮಲೆನಾಡು ಅಣು ವಿದ್ಯುತ್ ವಿರೋಧಿ ಹೋರಾಟ ವೇದಿಕೆಯ ನೇತೃತ್ವದಲ್ಲಿ ಇಂದು ಬೇಸೂರಿನಿಂದ ಸಾಗರದವರೆಗೆ ನಡೆದ ಬೃಹತ್ ಪಾದಯಾತ್ರೆಯಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಜನರು ಪಾಲ್ಗೊಂಡು ಯೋಜನೆಯ ವಿರುದ್ಧ ಗುಡುಗಿದ್ದಾರೆ.

ಪಕ್ಷಾತೀತ ಹೋರಾಟಕ್ಕೆ ಶ್ರೀಗಳ ಕರೆ:

ಬೇಸೂರಿನ ಬಸವಣ್ಣ ದೇವರ ದೇವಾಲಯದ ಆವರಣದಲ್ಲಿ ಮೂಲೆಗದ್ದೆ ಮಠದ ಶ್ರೀ ಅಭಿನವ ಚನ್ನಬಸವ ಸ್ವಾಮೀಜಿ ಅವರು ಪಾದಯಾತ್ರೆಗೆ ಅಧಿಕೃತ ಚಾಲನೆ ನೀಡಿದರು. "ಯಾವುದೇ ಒಂದು ಹೋರಾಟ ಯಶಸ್ವಿಯಾಗಬೇಕಾದರೆ ಅದು ಪಕ್ಷಾತೀತವಾಗಿ ನಡೆಯಬೇಕು. ಈ ಅಣು ವಿದ್ಯುತ್ ಸ್ಥಾವರದ ವಿರೋಧಿ ಹೋರಾಟವೂ ರಾಜಕೀಯ ಮುಕ್ತವಾಗಿ ಮುನ್ನಡೆಯಲಿ," ಎಂದು ಅವರು ಆಶಿಸಿದರು.

ತಾಳಗುಪ್ಪ ಕೂಡ್ಲಿ ಮಠದ ಸಿದ್ಧವೀರ ಸ್ವಾಮೀಜಿ ಮಾತನಾಡಿ, ಮಲೆನಾಡು ಅತ್ಯಂತ ಸೂಕ್ಷ್ಮ ಪರಿಸರವನ್ನು ಹೊಂದಿದ್ದು, ಇಲ್ಲಿ ಅಣು ವಿದ್ಯುತ್ ಸ್ಥಾವರದಂತಹ ಮಾರಕ ಯೋಜನೆಗಳ ಅನುಷ್ಠಾನ ಕಿಂಚಿತ್ತೂ ಸಮಂಜಸವಲ್ಲ. ಸರ್ಕಾರ ಕೂಡಲೇ ಈ ಯೋಜನೆಯನ್ನು ಕೈಬಿಡಬೇಕು ಎಂದು ಆಗ್ರಹಿಸಿದರು. ಆನಂದಪುರ ಮುರುಘಾ ಮಠದ ಶ್ರೀ ಮಲ್ಲಿಕಾರ್ಜುನ ಮುರುಘರಾಜೇಂದ್ರ ಸ್ವಾಮೀಜಿಗಳು ಸಹ ಹೋರಾಟದಲ್ಲಿ ಹೆಜ್ಜೆಹಾಕಿ ಯೋಜನೆಗೆ ತಮ್ಮ ಕಟು ವಿರೋಧವನ್ನು ದಾಖಲಿಸಿದರು.

ಊರಿಗಾಗಿ, ಉಸಿರಿಗಾಗಿ ಘೋಷಣೆಗಳ ಮೊಳಗು:

"ಏನೇ ಆದರೂ ಬೇಸೂರು ಕೊಡೆವು", "ಊರಿಗಾಗಿ, ನೀರಿಗಾಗಿ, ಉಸಿರಿಗಾಗಿ ಹಾಗೂ ಬದುಕಿಗಾಗಿ" ಎಂಬೆಲ್ಲಾ ಘೋಷವಾಕ್ಯಗಳೊಂದಿಗೆ ಸಾಗಿದ ಬೃಹತ್ ಮೆರವಣಿಗೆಯು ಬೇಸೂರಿನಿಂದ ಹೊರಟು ಹುಲಿ ದೇವರಬನ, ಗೆಣಸಿನಕುಣಿ, ಅವಿನಹಳ್ಳಿ, ಕಾಗೆಹಳ್ಳ, ಹೊಸೂರು, ಇಕ್ಕೇರಿ ಸರ್ಕಲ್ ಮಾರ್ಗವಾಗಿ ಸಾಗರ ಪಟ್ಟಣವನ್ನು ತಲುಪಿತು. ದಾರಿಯುದ್ದಕ್ಕೂ ಸಾರ್ವಜನಿಕರು ಹೋರಾಟಗಾರರಿಗೆ ಬೆಂಬಲ ಸೂಚಿಸಿದರು.

ಅಂತಿಮವಾಗಿ ಸಾಗರದ ಉಪವಿಭಾಗಾಧಿಕಾರಿ (ಎಸಿ) ಕಚೇರಿಯ ಮುಂದೆ ಜಮಾಯಿಸಿದ ಪ್ರತಿಭಟನಾಕಾರರು ಡಿಸಿ ಪ್ರಭುಲಿಂಗ ಕವಲಿಕಟ್ಟಿ ಅವರ ಮೂಲಕ ಸರ್ಕಾರಕ್ಕೆ ಮನವಿ ಸಲ್ಲಿಸಿದರು.

ಮೇ 27ರಂದು ಶಿವಮೊಗ್ಗ ಚಲೋ:

ಸರ್ಕಾರ ಈ ಪ್ರಸ್ತಾವಿತ ಯೋಜನೆಯನ್ನು ಕೈಬಿಡುವುದಾಗಿ ಲಿಖಿತ ರೂಪದಲ್ಲಿ ಭರವಸೆ ನೀಡುವವರೆಗೂ ನಮ್ಮ ಈ ಹೋರಾಟ ನಿರಂತರವಾಗಿರುತ್ತದೆ. ಇದರ ಮುಂದಿನ ಹಂತವಾಗಿ ಮೇ 27ರಂದು ಶಿವಮೊಗ್ಗ ಜಿಲ್ಲಾಧಿಕಾರಿಗಳ ಕಚೇರಿ ಎದುರು ಬೃಹತ್ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ ಎಂದು ಬೇಸೂರು ಅಣು ವಿದ್ಯುತ್ ಸ್ಥಾವರ ವಿರೋಧಿ ಹೋರಾಟ ಸಮಿತಿಯ ಅಧ್ಯಕ್ಷ ಇಂಧೂಧರ ಗೌಡ ಎಚ್ಚರಿಕೆ ನೀಡಿದ್ದಾರೆ.

ಈ ಸಂದರ್ಭದಲ್ಲಿ ಮಾಜಿ ಶಾಸಕ ಸ್ವಾಮಿರಾವ್ ಅವರು ಮಾತನಾಡಿ, "ಜನರ ಒಗ್ಗಟ್ಟಿನ ಹೋರಾಟದ ಎದುರು ಯಾವುದೇ ಸರ್ಕಾರ ನಿಲ್ಲಲು ಸಾಧ್ಯವಿಲ್ಲ, ಸ್ಥಾವರ ನಿರ್ಮಾಣಕ್ಕೆ ನಾವು ಅವಕಾಶ ಕೊಡುವುದಿಲ್ಲ" ಎಂದರು. ಪ್ರತಿಭಟನಾ ಸ್ಥಳದಲ್ಲಿ ಸಂಸದ ಬಿ.ವೈ. ರಾಘವೇಂದ್ರ, ಶಾಸಕ ಗೋಪಾಲಕೃಷ್ಣ ಬೇಳೂರು, ಮಾಜಿ ಶಾಸಕ ಹರತಾಳು ಹಾಲಪ್ಪ, ಎಂಎಲ್‌ಸಿ ಡಾ. ಧನಂಜಯ್ ಸರ್ಜಿ, ನಗರ ಸಭಾ ಅಧ್ಯಕ್ಷೆ ಮೈತ್ರಿ ಪಾಟೀಲ್ ಸೇರಿದಂತೆ ಹಲವು ಜನಪ್ರತಿನಿಧಿಗಳು, ರೈತ ಮುಖಂಡರು, ಪರಿಸರವಾದಿಗಳು ಹಾಗೂ ಗ್ರಾಮಸ್ಥರು ಉಪಸ್ಥಿತರಿದ್ದರು.

ಸಂಪಾದಕೀಯ ನುಡಿ : ಅಭಿವೃದ್ಧಿಯ ಹೆಸರಿನಲ್ಲಿ ಅರಣ್ಯನಾಶವೇಕೆ?

ಮಲೆನಾಡು ಕರ್ನಾಟಕದ ಶ್ವಾಸಕೋಶವಿದ್ದಂತೆ. ಇಲ್ಲಿನ ಹಸಿರು, ಜೀವವೈವಿಧ್ಯತೆ ಮತ್ತು ಪರಿಸರ ಸೂಕ್ಷ್ಮತೆಯನ್ನು ಕಾಪಾಡುವುದು ಕೇವಲ ಆ ಭಾಗದ ಜನರ ಜವಾಬ್ದಾರಿಯಲ್ಲ, ಇಡೀ ರಾಜ್ಯದ ಕರ್ತವ್ಯ. ಅಭಿವೃದ್ಧಿ ಮತ್ತು ವಿದ್ಯುತ್ ಉತ್ಪಾದನೆ ನಾಡಿಗೆ ಅನಿವಾರ್ಯ ಹೌದು, ಆದರೆ ಅದಕ್ಕಾಗಿ ಪಶ್ಚಿಮ ಘಟ್ಟಗಳಂತಹ ಸೂಕ್ಷ್ಮ ಪ್ರದೇಶದಲ್ಲಿ ಅಣು ವಿದ್ಯುತ್ ಸ್ಥಾವರದಂತಹ ಅಪಾಯಕಾರಿ ಯೋಜನೆಗಳನ್ನು ತರುವುದು ಎಷ್ಟರಮಟ್ಟಿಗೆ ಸರಿ? ಜನವಸತಿ ಮತ್ತು ದಟ್ಟ ಕಾನನದ ನಡುವೆ ಇಂತಹ ಯೋಜನೆಗಳು ತರುವ ವಿನಾಶದ ಮುನ್ಸೂಚನೆಯನ್ನು ಅರಿತೇ ಇಂದು ಬೇಸೂರಿನ ಜನತೆ ಬೀದಿಗಿಳಿದಿದ್ದಾರೆ. ಸರ್ಕಾರವು ಸ್ಥಳೀಯರ ಆತಂಕವನ್ನು ಕೇವಲ 'ಪ್ರತಿಭಟನೆ' ಎಂದು ಮೂಲೆಗುಂಪು ಮಾಡದೆ, ಪರಿಸರ ತಜ್ಞರೊಂದಿಗೆ ವಾಸ್ತವಿಕ ಅಧ್ಯಯನ ನಡೆಸಿ, ಮಲೆನಾಡಿನ ಉಸಿರಿಗೆ ಕುತ್ತಾಗುವ ಇಂತಹ ಯೋಜನೆಗಳನ್ನು ಶಾಶ್ವತವಾಗಿ ಕೈಬಿಡುವ ವಿವೇಕ ಪ್ರದರ್ಶಿಸಬೇಕಿದೆ. ಪ್ರಕೃತಿ ಮುನಿದರೆ ಅದಕ್ಕೆ ಪರ್ಯಾಯವಿಲ್ಲ ಎಂಬುದನ್ನು ಆಡಳಿತಗಾರರು ಮರೆಯದಿರಲಿ.

- ಸಂಪಾದಕರು, ಕನ್ನಡ ಗ್ಲೋಬಲ್ ನ್ಯೂಸ್