ಸಾಗರ: ಅಗ್ನಿವೀರ್ ಆಕಾಂಕ್ಷಿಗಳಿಗೆ ಸುವರ್ಣಾವಕಾಶ; ಮೇ 13ರಿಂದ ಉಚಿತ ಸೈನಿಕ ತರಬೇತಿ ಶಿಬಿರ ಆರಂಭ

ಸಾಗರ: ದೇಶಸೇವೆಯ ಕನಸು ಹೊತ್ತಿರುವ ಮಲೆನಾಡಿನ ಯುವಕರಿಗಾಗಿ ಸಾಗರದಲ್ಲಿ ಉಚಿತ ಸೈನಿಕ ತರಬೇತಿ ಮತ್ತು ಮಾಹಿತಿ ಶಿಬಿರವನ್ನು ಆಯೋಜಿಸಲಾಗಿದೆ. ಮೇ 13ರಿಂದ ಮೇ 28ರವರೆಗೆ ಈ ವಿಶೇಷ ಶಿಬಿರ ನಡೆಯಲಿದ್ದು, ಅಗ್ನಿವೀರ್ ನೇಮಕಾತಿ ಪ್ರಕ್ರಿಯೆಯಲ್ಲಿ ಭಾಗವಹಿಸಲು ಇಚ್ಛಿಸುವ ಅಭ್ಯರ್ಥಿಗಳು ಇದರ ಸದುಪಯೋಗಳನ್ನು ಪಡೆಯಬಹುದಾಗಿದೆ ಎಂದು ಮಲೆನಾಡು ಸೋಲ್ಜರ್ಸ್ ಸಂಸ್ಥೆಯ ಅಧ್ಯಕ್ಷ ಕಿಶೋರ್ ಬೈರಾಪುರ ತಿಳಿಸಿದ್ದಾರೆ.

ನಗರದ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಭವನದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ತಾಲೂಕಿನ ಪ್ರಸಿದ್ಧ ಕ್ಷೇತ್ರವಾದ ಸಿಗಂದೂರು ಚೌಡೇಶ್ವರಿ ದೇವಾಲಯದ ಆವರಣದಲ್ಲಿ ಈ ಶಿಬಿರ ನಡೆಯಲಿದೆ. ಮಲೆನಾಡು ಸೋಲ್ಜರ್ಸ್ ಸಂಸ್ಥೆ ಹಾಗೂ ಸಿಗಂದೂರು ಶ್ರೀ ಚೌಡೇಶ್ವರಿ ದೇವಸ್ಥಾನ ಸೇವಾ ಟ್ರಸ್ಟ್ ಸಹಯೋಗದಲ್ಲಿ ಅಭ್ಯರ್ಥಿಗಳಿಗೆ ಉಚಿತ ಊಟ ಮತ್ತು ವಸತಿ ವ್ಯವಸ್ಥೆಯೊಂದಿಗೆ ತರಬೇತಿ ನೀಡಲಾಗುವುದು ಎಂದರು.

ತರಬೇತಿಯ ಅಗತ್ಯತೆ ಏಕೆ?

ಭಾರತೀಯ ಸೇನೆಯ ಆಮಿರ್, ಏರ್‌ಫೋರ್ಸ್ ಹಾಗೂ ನೇವಿಯಲ್ಲಿ ಸೈನಿಕ ಹುದ್ದೆಗಳ ಭರ್ತಿಗಾಗಿ ಈಗಾಗಲೇ ಅರ್ಜಿ ಆಹ್ವಾನಿಸಲಾಗಿದ್ದು, ಜೂನ್ 1ರಿಂದ ಲಿಖಿತ ಹಾಗೂ ದೈಹಿಕ ಸಾಮರ್ಥ್ಯ ಪರೀಕ್ಷೆಗಳು ಆರಂಭವಾಗಲಿವೆ. ಗ್ರಾಮೀಣ ಭಾಗದ ಅನೇಕ ಯುವಕರಿಗೆ ಪೂರ್ವ ಸಿದ್ಧತೆಯ ಕೊರತೆಯಿಂದಾಗಿ ಹಾಗೂ ಪರೀಕ್ಷೆಗಳನ್ನು ಎದುರಿಸುವ ಸರಿಯಾದ ಮಾಹಿತಿ ಇಲ್ಲದೆ ವಿಫಲರಾಗುತ್ತಿದ್ದಾರೆ. ಇದನ್ನು ತಪ್ಪಿಸುವ ನಿಟ್ಟಿನಲ್ಲಿ 15 ದಿನಗಳ ಕಾಲ ಈ ತರಬೇತಿ ಆಯೋಜಿಸಲಾಗಿದೆ.

ತರಬೇತಿಯ ಮುಖ್ಯಾಂಶಗಳು:

• ದೈಹಿಕ ಸಾಮರ್ಥ್ಯ: ಓಟ ಮತ್ತು ಇತರೆ ದೈಹಿಕ ಪರೀಕ್ಷೆಗಳಿಗೆ ತಜ್ಞರಿಂದ ತರಬೇತಿ.

• ಲಿಖಿತ ಪರೀಕ್ಷೆ: ಪರೀಕ್ಷೆಯನ್ನು ಎದುರಿಸುವ ವಿಧಾನ ಮತ್ತು ಪಠ್ಯಕ್ರಮದ ಮಾಹಿತಿ.

• ದಾಖಲಾತಿ ಮಾರ್ಗದರ್ಶನ: ನೇಮಕಾತಿ ಸಮಯದಲ್ಲಿ ಬೇಕಾಗುವ ಅಗತ್ಯ ದಾಖಲೆಗಳ ಬಗ್ಗೆ ವಿವರಣೆ.

• ತಜ್ಞರಿಂದ ಮಾರ್ಗದರ್ಶನ: ಪ್ರಸ್ತುತ ಸೇನೆಯಲ್ಲಿರುವವರು, ನಿವೃತ್ತ ಯೋಧರು ಹಾಗೂ ಸೈನಿಕ ನೇಮಕಾತಿ ಅಧಿಕಾರಿಗಳು ಶಿಬಿರಾರ್ಥಿಗಳಿಗೆ ಮಾರ್ಗದರ್ಶನ ನೀಡಲಿದ್ದಾರೆ.

ಈ ಹಿಂದೆ ಸಂಸ್ಥೆಯ ವತಿಯಿಂದ ನಡೆಸಲಾದ ಶಿಬಿರದ ಮೂಲಕ 26ಕ್ಕೂ ಹೆಚ್ಚು ಯುವಕರು ಸೇನೆಯ ವಿವಿಧ ವಿಭಾಗಗಳಿಗೆ ಆಯ್ಕೆಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ ಎಂದು ಕಿಶೋರ್ ಮಾಹಿತಿ ನೀಡಿದರು. ಸುದ್ದಿಗೋಷ್ಠಿಯಲ್ಲಿ ನೇತಾಜಿ ಸುಭಾಷ್ ಚಂದ್ರಬೋಸ್ ಯುವ ಟ್ರಸ್ಟ್ ಅಧ್ಯಕ್ಷ ಸುಭಾಷ್ ಕೊತಳ್ಳಿ ಉಪಸ್ಥಿತರಿದ್ದರು.

ನೊಂದಣಿಗಾಗಿ ಸಂಪರ್ಕಿಸಿ:

ಆಸಕ್ತ ಯುವಕರು ಹೆಚ್ಚಿನ ಮಾಹಿತಿಗಾಗಿ ಮತ್ತು ಹೆಸರನ್ನು ನೊಂದಾಯಿಸಿಕೊಳ್ಳಲು ಈ ಕೆಳಗಿನ ಮೊಬೈಲ್ ಸಂಖ್ಯೆಗಳನ್ನು ಸಂಪರ್ಕಿಸಬಹುದು:

7019776749, 9448954052

---

ಸಂಪಾದಕೀಯ ನುಡಿ:

ಯುವಶಕ್ತಿಯೇ ದೇಶದ ಆಸ್ತಿ. ಗ್ರಾಮೀಣ ಭಾಗದ ಪ್ರತಿಭೆಗಳಿಗೆ ಸೂಕ್ತ ಮಾರ್ಗದರ್ಶನ ಸಿಕ್ಕಾಗ ಅವರು ಅಸಾಧ್ಯವಾದುದನ್ನು ಸಾಧಿಸಬಲ್ಲರು ಎಂಬುದಕ್ಕೆ ಇಂತಹ ಸೈನಿಕ ತರಬೇತಿ ಶಿಬಿರಗಳೇ ಸಾಕ್ಷಿ. ಸಿಗಂದೂರು ಶ್ರೀ ಚೌಡೇಶ್ವರಿ ಟ್ರಸ್ಟ್ ಹಾಗೂ ಮಲೆನಾಡು ಸೋಲ್ಜರ್ಸ್ ಸಂಸ್ಥೆಯ ಈ ಸೇವಾ ಕಾರ್ಯ ಶ್ಲಾಘನೀಯ. ನಮ್ಮ ಭಾಗದ ಯುವಕರು ಈ ಅವಕಾಶವನ್ನು ಬಳಸಿಕೊಂಡು ತಾಯಿನಾಡಿನ ರಕ್ಷಣೆಗೆ ಮುಂದಾಗಲಿ ಎಂಬುದು 'ಕನ್ನಡ ಗ್ಲೋಬಲ್ ನ್ಯೂಸ್' ಆಶಯ.